Friday, April 01, 2011

وشوشة بصوت عالي



-1-

على سيرة قاطعوا المنتجات الدنماركية – الهولندية – الامريكية ... و اليوم صارت حملة المنتجات السعودية .. اجا ببالي همين اسوي حملة قاطعوا المنتجات العراقية ... باعتبار حكومتنا المنتخبة تعاملت بشكل انساني جدا مع التظاهرات و لانه موفرين كل الخدمات الغذائية و العلاجية للشعب الفقير

بس تذكرت انه اساسا ما عدنا منتجات عراقية ... لذلك وشوشت نفسي و كلت احسن شي نخلي الشعار

قاطعوا اي منتج مستورد من شركات الوزراء و البرلمانيين العراقيين في الخارج

طويل مو ؟؟؟؟


بس هم رجعت تذكرت .. اذا قاطعنا منتجات الشركات أعلاه ... رح نقاطع 90% من المواد الموجودة بالسوق ....

بعدين تذكرت هم ميخالف ... نعيش على الحصة التموينية ...  بس تدرون اكثر موادها ما متوفرة بالمراكز ...

اخر شي  قررت اوشوش وي نفسي احسن!




-2-

بطريق الرجعة من الدوام ساعة 3 الظهر  ... فتحت الراديو و اذا اغنية عبدالحليم .. في يوم في شهر في سنة ...

تذكرت وعد عمنا الجبير .... خلال 100 يوم تقييم عمل الوزارات ... و الاصلاح .....

و بما انه مر اول شهر على  تقديري.... و ما شفت اي اصلاح ولو بسيط بعمل امانة بغداد و لا بعمل محافظة بغداد



لا يم بيتنا ...و  لا بطريقي للشغل .. لا بمنطقة شغلي ...  ولا حتى بالخط السريع ...

و بما انه ما رح تصير معجزة باليوم رقم 99 ساعة 12 بالليل


همين شاورت نفسي و كلت ... خلي صابر العيساوي أمين العاصمة  و كامل الزيدي محافظ بغداد و  جماعة مجلس المحافظة

يقدمون استقالتهم من هسه ... ليش يجيهم قرار اعفاء من مكتب رئيس الوزراء ....

و تصير إقالة بدل استقالة  ...

بس همين تذكرت ... انه مصالح العصابات (اللي يسمون نفسهم احزاب) تتلاكى دائما من يوم 1 الى يوم 1000 ... فعرفت ما رح تجيهم لا اقالة و لا بطيخ !

بعدين تفر السالفة عليه و اني اقدم استقالتي




-3-

وعدونا اللي انتخبناهم من 2003 الى 2010 ... رح تنحل سالفة الكهرباء سنة 2007 و 2009 و 2010 و هسه اخر وعد رح تتحسن الكهرباء بخريف 2012 الى 16 ساعة باليوم


كلت وي نفسي .. اييييييييييييييي رح نخلص من هم المولدة بنهاية 2012 ...


بعدين هم تذكرت ... انه احد المسؤولين يملك شركة استيراد مولدات كهربائية .. 
 اكيد رح يمون على سيادة وزير الكهرباء و يطلب تأجيل الموعد لخريف 2015 بين ما يرتب اموره و يبيع كل المولدات للمواطنين العراقيين  حتى يفتح تجارة جديدة 


و بنفس الوقت مشاريع الاسالة و الاعمار همين رح يؤجلوها الى خريف 2014 و ربيع 2016 .... و يمكن شتاء 2020 .... بين ما المسؤولين اللي يستوردون الاسمنت  وباقي المواد الانشائية يرتبون امورهم .. و  يبيعون كل البضاعة بدون اي خسائربالآرباح ....


خطية شعدهم مستعجلين ؟



و عيش يا كديش