الانتخابات في بلاد الرافدين ...

بقي يومان فقط تفصلنا عن الانتخابات المصيرية التي ستحدد مصيرنا حسب زعم السياسيين الافاضل
يومان و ينتهي الارهاب و الفساد الاداري و ازمة الخدمات .... 


قوائم تحوي كل الاطياف ... من اقصى الاسلاميين  الى القوميين الى العلمانيين تحت مظلة احد السياسيين المشهورين و رجال الاحزاب صارت موزعة على هذه القوائم ... متنافسين مع بعض 

قوائم ... بلا برنامج انتخابي .. بلا دستور حزبي بلا ضمانات لتنفيذ الوعود ... 

و بعد سبع سنوات ... لا يوجد قانون تنظيم احزاب و العمل السياسي  ..

 فمتى يصدر ؟ و هل في نية النواب تنظيم العمل السياسي اصلا ؟!

و الادهى من هذا .. فهل ستبقى هذه التحالفات بعد الانتخابات ... ام سيرجع الكل الى الخانة الاولى ...

أظن اذا تغيرت هذه التخالفات عند المحاصصة و ما الى ذلك ..

ستكون عملية نصب و احتيال على المواطن الذي فضل قائمة ضد اخرى ..  
و يتفاجئ بتغيير مواقف النواب بعد الانتخابات ... او التخلي عن المبادئ مقابل الاستفادة و تعويض اموال الحملة الانتخابية !

طيعا لا اتكلم عن كل السياسيين ..

-------------

بالواقع هنا تتجلى سايكولوجية الانسان الشرقي  ... الحلم بشخص "مخلـّص" يجي و يحل كل المشاكل و نحن نطلع بالهوسة و التصفيق و نفرح به!


سايكولوجية التعلق بالشخص لا التعلق بالمبادئ ... و لحسن ظننا فيه ... سننتخب الذي معه دون ان نعرف عنهم شيئا ... و لا ندري اذا فعلا ناوين التكملة مع هذا المخلص ام الاشتراك مع مخلص جديد !




و لذلك نحن كعراقيين لا نريد التغيير بأنفسنا بس ننتظر العصا السحرية ... و نلوم الحكومة او السياسيين .. و ننتخبهم
و لذلك يبقى العالم الثالث ثالثا .. 


ختاما .. اذكر شعار رئيس الوزرء نوري المالكي ... الارادة و التغيير 
هو بعد 4 سنوات حكم ... ايضا يريد التغيير ... و له الارادة على التغيير .. بس الظروف و اصوات دول الخارج التي لا تريد للعراق النهوض .. و ذوي الانفس الضعيفة .. و و و وو  تطول القائمة !


ملاحظة أخيرة .. 
بس يا ريت السياسيين الكف عن تشبيه التجرية الدينقراطية في العراق بالتجرية الالمانية او الايطالية او اليابانية ... لان لا يوجد تشابه بالواقع الحزبي و الديمقراطي بيننا و بينهم
هاي الاسطوانة صارت قديمة و مشخطة ... و لازم تلكون سيدي جديد تماشيا مع روح العصر !

الهرم الانبطاحي 3

طبقة اصحاب المشاريع ... 

اكثر ناس بعيدين عن النقاش الايديولوجي.. تفكيرنا محصور بالتقدم المالي و الاسهم و العقارات و الزبائن .... الخ 

شفنا الايديولوجيات ما طعمت اللي مشغولين بيها خبز !

اكثر طبقة اسست روابط بين الشعوب عبر العصور ... ما عدنا مانع نبيع بضائعنا او نشتري بضائع من بلدان "غير صديقة" مع بلدنا الام  ..  و حتى لا يزعل احد نكتب made in w.Germany

و ما عدنا مانع  نتعاون مع شركات اجنبية او نستقدم عمالة اجنبية... بالنهاية business is business 

اكثر ناس نتعامل بدبلوماسية و شفافية و طولة بال حتى اكثر من السياسيين ... اي والله اكثر منهم 

لو يشغلونا بالسلك الدبلوماسي كان انحلت مشاكل دولية كثيرة  ... لان نعرف الدواء الشافي لكل الازمات 

تعلمنا نبيع السمك بالشط (و علينا تحديدا طلع المثل) ... لا و الاحلى يطلع الزبون الشاري و هو مقتنع 100% هو صار يملك السمك و حتى القوارب اللي على النهر ... 

 و يمكن يطلع ما مقتنع بس مستحيل يطلع بلا ما يدفع المقسوم ... !

خلينا الزبون يطلب منا نشتري له بيت و سيارة  بالتقسيط ... لا و الاحلى ..  هو مقتنع هو صاحب البيت 

بس الحقيقة .. هو البيت النا حتى آخر قسط يدفعه الكادح ... بس اثبت الزمن احنا اولاد اصول ما نستغل هذا الحق القانوني الا في حال تقاطع مع مصالحنا 

حتى ما تشعر بالملل من البضاعة  .. نجيب بضاعة رخيصة بس رديئة ... حتى كل شهر تشتري شكل جديد و لون جديد .. بالناية المنظر اهم من النوع 

بدل ما تاكل شاورما و انت ماشي بالشارع  .. تعال اقعد و تتدلل و اشرب عصير فريش ... و ادفع 5 او 6 اضعاف 

بالنهاية انت جاي ترتاح من ضغوطات الحياة اكثر مما جاي تاكل .. لان الاكل موجود بالبيت

- انصح الشباب المكافح .. كل ما تحصل مبلغ مرتب  لا تصرفه على الرفاهية و اشياء فانية طايرة 

جيب المبلغ اللي عندك و ابدي حياة الاستثمار ... و بعدين فكر بالصرف

صدقني رح تنسى حلم الرفاهية و احلام الشباب و المراهقة .. حتى لو اشتركت برحلة سياحية الى الكاريبي او منتجعات سويسرا .. لان صرت شخص جديد و "عملي" حسب قاموسنا 

اذا حصلت ازمة مالية و سيولة .. رح تطير فلوسك صحيح ...

 بس مع ذلك ما رح تنسى الامور اللي حصلتها من خلالنا.. بيت حديث او سيارة اخر موديل ... و عيشة مرتبة ... و سيكار كوبي فاخر .. الخ

نصيحة ثانية للشباب .. يا اخي بدل ما تروح بطريق الدراسات العليا و الماجستير و تعب و قياسات و بالنهاية ما رح تحصل عمل بسلك التعليم الا بواسطة ... و بالنهاية رح تجي تشتغل محاسب او مندوب تجاري ويانا ... 

يا اخي اختصر الطريق من بالبداية و لا تتعب نفسك و تتأخر عن مسيرة الحياة 

- طبعا مقابل كل هذه الخدمات الجليلة ... عزيزي الموظف لازم تشتغل بجد و بتعب ... و تقابل الاحسان بالاحسان ... 

و بالنهاية احنا مثلك ... مشاريعنا بالقروض .. و الديون كثيرة و السيولة قليلة ... و راكضين مع الضغوطات الحياتية 

بس الفرق احنا تعبنا نفسي ... و انت تعبك نفسي و جسدي و جسمي 

- فلولا مشاريعنا التنموية و شركاتنا و اسهمنا ... ما رح تلاقي شغل مرتب ...  مكانات رفاهية من سينما و مطاعم و فنادق .. ما رح تعيش مرتاح حسب طريقتنا طبعا  ... 

لذلك صح القول ..  we eat for you 

الهرم الانبطاحي 2

نكمل بالطبقة الاخيرة ... 

عزيزي المواطن / عزيزتي المواطنة .. 

انت مميز بطريقة رائعة .. بس لازم تعرف تكتشف الموهبة 

بس بين ما تفكر شنو هي موهبتك ... لازم تظل تركض باستمرار حتى تصعد و ترتاح (قبل ما يفوتك الوقت بالتفكير)

و لا تهتم ابدا  باللي مات و ما محصل شي من المواهب اللي امتلكها.. هو ما عنده موهبتك و ذكائك الخاص 

  و ربما بل أكيد استعمل الموهبة بالمكان و الوقت غير المناسبين ..

طبعا ما تنسى تشتري كتاب كيف تصبح مليونيرا بسبعة شهور (بدون معلم) .. و كتاب اصعد السلم خطوة خطوة (بالعكازة)

هذه الكتب تعلمك الاحلام بكل انواعها

 - التعليم مهم جدا حتي يمشي البلد .. بس اذا الراتب و راتب زوجتك ما كفى المعيشة و مواكبة العصر  و تركت شهادتك حتى تفتح محل... مو غلط 

بس حتى لو ما قدرت تدبر خبز لولدك ... لا تبطلهم من الدراسة ... خليهم يدرسون و يشتغلون بعد الدوام

هواية مشاهير بالعالم اشتغلوا و درسوا نفس الوقت .. و حتى قسم منهم ايتام

مثلا بيكاسو  من كان طالب كان يشتغل بمطعم ... و ولدك مو احسن من بيكاسو ! ....  (مع كل الاعتذار للفنان الكبير اذا استخدنا الاسم افتراضيا)

-------------------------------

النظام ماشي على ال feedback .. التغذية الراجعة الى الكبار

يعني اذا تريد تؤجر بيت اكبر .. لازم تشتغل شغلة اضافية 

اذا تريد تلفزيون ...موبايل .. اشتراك انترنيت .. خدمات كهرباء ... او  سيارة افضل .. لازم تشتغل اكثر و تركض اسرع .. و طبعا كل ما تشتري. .انت تدفع فلوس التصنيع و النقل و الجمارك و الضريبة

و بالنهاية انت صحيح ظليت بمكانك .. بس النظام المالي تقدم للأمام و انشال الهرم باساس أقوى و اعرض  .. و انفتحت مصانع اكثر و مطاعم راقية اكثر و كوفيشوبات  ... و كبرت كروش اصحاب الاموال على حساب صحتك عزيزي المواطن !

اهم شي .. تظل بمكانك .. و ما تفكر تتقدم و تغير الواقع و الفساد الاداري ... لان اجرة التفكير و العمل بالزمان غير المناسب (تموت من جوعك على اقل تقدير ) !

يُـتبع

الهرم الرأسمالي .. (الانبطاحي).

الهرم الرأسمالي او الانبطاحي *

بالحقيقة ما عرفت منو الرسام المبدع صاحب الفكرة ... بس اوجه له تحية كبيرة جدا لان معبر جدا

المهم الهمني ببعض الافكار .. اللي رح احكي عنها ضمن حلقات  .. رح يكون التركيز على الواقع اللي نعيشه في العالم العربي

لمشاهدته بحجم اكبر من هنا

 

-1-

الطبقة الاخيرة .. الطبقة العاملة و لسان حالها يقول

we work for all

الطبقة اللي ما تشتغل ابدا ..

ما تشتغل بشكل صحيح على الحكمة الشهيرة من جد وجد

الطبقة اللي تريد تاكل بملعقة "معدنية" .. او حتى بلاستيك .. المهم تاكل

الطبقة اللي ما ممكن نقارنها بأناس قضوا حياتهم بالعمل .. لانها تشتغل بشكل غير صحيح و ما توفقت لاسباب غامضة

و مع ذلك هم اللي شايلين قاعدة الهرم ... فشلون اذا اشتغلوا

طبعا .. الكلام اللي يتبادر دائما الى المسامع ... خاصة بالعالم العربي

كل واحد ياخذ على قد الشغل و التعب اللي اشتغله بالحياة

ما نقارن اللي اشتغل و درس باللي ما تعب .. لذلك هذا يعيش ببيت و هذا ما عنده بيت

      مو من العدالة نقارن ابناء المجدين الدؤوبين الى العمل .. بولد العاطلين عن العمل

يمكن من غير العادل هي العالم تعيش مرتاحة.. لان اذا عاشت مرتاحة و مرفهة منو رح يشتغل و يتعب و يبني ... منو رح يشيل الهرم

مو عدالة ... لان كل المبدعين بالعالم كانت ظروفهم سيئة ... فمن العدل تدفع كل الشعب الى المعاناة حتى تخرج مبدعين جدد . و نرفع راسنا بيهم

حلوة مبادئ العدالة حسب المفهوم الانبطاحي

يُتبع

------------------------------------------------------------------

انبطاحي  .. جاية من الانبطاح و الاسترخاء على ظهور المواطنين ... مع ضمان بقائهم في مكانهم دائما *

يعني نقدر نقول .. انبطاحي هي تسمية ساخرة للرأسمالية الشديدة ... المترافقة مع امور اخرى سنأتي لذكرها لاحقا ...

ديمقراطية

جاء قرار استبعاد قائمة صالح المطلك من ضمن نشاطات هيئة المسائلة و العدالة (اجتثاث البعث سابقا)  باستبعاد 16 كيان سياسي من الانتخابات و من ابرزهم كيان الدكتور صالح المطلك ..

و طبعا اصوات الموالين سارعت بالفرح و التهليل لهذا الانجاز الديمقراطي .. مقابل اصوات المعارضين ساعرت بالهجوم على الحكومة بنفس الوتيرة

طائفية بحتة للأسف 

ما هو ملفت للنظر تجربة انتخابات مجالس المحافظات التي ابرزت كيان  ثالث في المحافظات الغربية وهو الصحوة ..

و طبعا نفس الانتخابات المحلية بينت تفوق  قائمة دولة القانون برئاسة رئيس الوزراء المالكي على الائتلاف التي من المفترض ان تغير الخارطة السياسية في البرلمان

و لن ننسى تحالف الهاشمي مع المطلك و اياد علاوي في قائمة واحدة .. خاصة ان الهاشمي استخدم صلاحياته لتعطيل و تعديل قانون الانتخابات مؤخرا

توقيت الاستبعاد قبل الانتخابات له تأثير كبير و غالبا سيكرس النزعة الطائفية  على صناديق الاقتراع حتى لو الغي القرار ! 

مهما يكن ليس دفاعا عن المطلك اذ انا اختلف معه في سياسيا بصورة جذرية

لكن دفاعا عن الديمقراطية و الحرية التي وعدونا بها  .... عن العراق التعددي الحر و القضاء المستقل و تنفيذ كل بنود الدستور

توقعات 2010

طبعا الفضائيات العربية طلّعت التوقعات ليلة راس السنة .. بس اجهزتنا الفلكية صينية لذلك تأخرت الشغلة عدة ايام

خلافات حادة جدا بين اعضاء قائمة انتخابية كانت قد تشكلت قـُبيل الانتخابات 

اصابة مواطن بسكتة قلبية نتيجة تنفيذ احد النواب احدى وعوده الانتخابية بمدة قياسية

وصول صور جلسة سهر وطرب ... تتضمن رئيس تحرير صحيفة معارضة مع مدير احدى الفضائيات المؤيدة للحكومة

احد المسؤولين يشاهد بالفضائيات محاكمته بتهم فساد

هذا ووعدنا ان يكمل الفلكي (غير المنجم) التوققعات عندما يتحسن مزاجه اكثر

انتخابات × انتخابات 2.. فراغ دستوري

بعد متابعة مبسطة للاعلام بالفترة الاخيرة ...  نشوف الانتخابات بكل تفرعاتها هي الشغل الشاغل

لكن ما لفت نظري عبارة رئيس مجلس النواب ..

الفراغ الدستوري

طبعا .. لانه البلد ماشي على 24 حباية .. و بس ظل قانون الانتخابات

صار 4 سنين ما اتفقتو على الدستور  و الحجة الجاهزة .. كركوك

و ما انطبقت بنود مهمة متل قانون النفط .. و الحجة الملف الامني  

طبعا .. حقهم يخافون من هذا الفراغ .. لان اذا ما انتخبناهم من جديد ... منو رح يسيّر امور الشعب الفقير المظلوم .. مو حب الامتيازات اللا محدودة  !

اللي يشوف ربع ساعة من أي قناة فضائية .. يتوقع بعد اذار 2010 .. رح تتحسن وزارة الكهرباء و يتحسن الوضع الامني و ينتهي كل مظاهر الفساد الاداري .....  و و و و وعود ماتخلص

بس بعد الانتخابات رح ترجع الحجج نفسها

المهم  الحمد لله .. ما وصلنا للفراغ الدستوري و تشرع القانون

بس نتمنى الفراغ الامني .. والفراغ الخدماتي .. يجي ببال الحكومة و ببال سعادة النواب  اللي اغلبهم راجعين للدورة الجديدة

و احب بمناسبة قرب نهاية الدورة الاولى اهني مجلس النواب .. على ما قدمه للشعب  من خدمات لا تحصى ..

على امل تتغير الوجوه و تتغير الافعال

أمل !