حاروا الاميركان شلون لازم يكون شكل جوهرة الشرق الاوسط و ديزاين العراق الجديد
عبالهم كلشي يتصمم بالفوتوشوب
المهم بعد المناقشات الحثيثة اتفقوا لازم هاي الجوهرة تكون على الطراز الامريكي مية بالمية
فالجماعة كالوا .. لازم يكون العراق فدرالي .. سموه العراق الاتحادي
لازم بكل محافظة يتشكل مجلس محافظة و محافظ اضافة الى فتح باب تحقيق اقاليم جديدة
من اخر اقتراحات الشباب ... تشكيل مجلس شيوخ عراقي بواقع نائبين من كل محافظة تماما كمجلس الشيوخ الامريكي و بنفس صلاحيات مجلس الكونكرس حتى تتكرر نفس التجرية الديمو قراطية
من اخر الاقتراحات لبايدن افندي .. تشكيل مجلس امن قومي يشمل كل الكراسي سوا من رئاسة و رئااسة وزراء و رئاسة الاقليم المقدس .. باعتبار القادة السلاطين مختلفين ع اللغف و النفوذ فالحل اعطاءهم مناصب جديدة حتى تزيد رواتبهم و يشكلون الحكومة
و لازم يتأكد من ضعف الجيش العراقي حتى ما يتدخل بالحكومة مستقبلا ...
ناسين ان الاحزاب اللي شكلت الحكومة تملك ميليشيات لولاها ما تصعد للسلطة
بالحقيقة ... اغراق العراق بمجالس و تشكيلات عبارة عن موظفين بطالين يهدرون المال العام و يتنافسون على المشاريع بحجة صراع السلطات ... ما هو الا فصل جديد- قديم للقيادة الامريكية و اللي يريد سياسينا الافاضل تطبيقها حرفيا من اجل مصلحة كروشهم
بدل من حملة اعمار العراق كما ادعوا سنة 2003
هذه هي امريكا ... شركات عملاقة تدعم احد الشعراء او الخطباء المميزين حتى يدخل الكونكرس و ياخذ عمولة على كل مشروع جديد
و الناخب الامريكي لا يهمه الايديولوجية اللي يحملها النائب .... انما خطابه الشعري الحماسي و هل هو من جماعة شركات النفط الا من جماعة شركات الاعلام ... و اهم شي يغطي غسيل الاموال
لكن المأساة الاضافية بالعراق ... انه الخطباء و الشعراء هم واجهات لاحزاب اقطاعية همها الاول تقسيم البلد على اساس طائفي بمساعدة الصحف الصفراء و الاعلام الطائفي ...
رحم الله ترابك يا ابراهام لينكولن .. عبالك بالحرب الاهلية قضيت على العبودية ... لا عمري لا
بالعكس جماعتك الغوا الاقطاع الجنوبي حتى يشكلون نواة الاقطاع العالمي
بايدن: احنا ما نتدخل بالشؤون الداخلية العراقية .. بس لازم تطبقون تجربتنا باللغف تماما
4 comments:
اغاتي ابو ساره....اكيد الامريكان يدعمون كرش كل من هو مستعد لبيع العراق في سبيل حسابه المصرفي و كل هذا الدعم لهؤلاء الحثالات هدفه الامعان في اذيه و تدمير العراق...و ما شاء الله على الجماعه...ديتسابقون على المركز الاول في من سيثبته الامريكان و الايرانيين في سده الحكم...و مبروك عليهم زقنبوت الاحتلال الى ان يقول الشعب كلمته
كم هو مؤسف مآل العراق، ولكن تبقى الحسرة العظمى على ما سار به العراق حتى وصل إلى هذه النتيجة \الهدف، فقد تمت تسويته بـ اللاشيء، وهذا سبيل الطغاة في فرض طغيانهم.
واليوم يتكرر مرارًا قول بدر شاكر السياب:
وفي العراق ألف أفعًى تشرب الرَّحيق.
وكأنه كان يصوغ ما يسير عليه وطنه، ويكتبه ولم يعلم بعد أنه تم سلب العراق من كلِّ العراق.
فأكمل تارة أخرى ونكمل مثله:
لتبكينَّ على العراق
فما لديك سوى الدموع
وسوى انتظارك، دون جدوى، للرِّياح وللقلوع.
اخوي لبيب هو بعدنا ننتظر كلمة الشعب الحقيقية البعيدة عن كروش قطط الاحزاب اللي تدري ينتهي عيدها بهيجي حدث مهم
مرحبا خديجة و ان شا الله دائما تكونين ويانا
تعرفين هي مو الف افعى ... هي 3 افاعي كبرى من جماعة الكوبرا و مجموعة الثعابين الصغيرة وياها
مع الاسف هذا حال بلدنا واقع بين افكاك الاقطاع السياسي في القرن الواحد العشرين
شكرا و الف تحية
Post a Comment