قصص أمريكية مترجمة .. بتصرف
كان حسّوني (برواية ثانية جيمي و ثالثة كارلوس ... الخ من روايات حول العالم ) فقير جدا و ما عنده فلوس يشتري دفاتر ...
و بيوم من الايام جان يجدي (يستعطي) بالشارع بليلة ماطرة ,,, انقهرت عليه ام ستوري و شربته كلاص حليب بينما هو كان يريد عصير عنب
المهم .. بعد 30 سنة ام ستوري صار عدها فشل كلوي و ما عدها فلوس علاج .... و تخربطت و نقلوها للطوارئ ...
ثاني يوم الصبح لكت نفسها مسوية العملية ... و الفلوس مدفوعة بس ما تدري منين
و لكت كلاص لبن يمها
و طلع الدكتور حسوني .اشهر طبيب انف و اذن و حنجرة بالبلد ... هو نفس الولد اللي انطته حليب قبل تلاثين سنة
اييييييييييييييييييييييييي الدنيا زغيرة
----------------------
خالد و احمد طلاب هندسة حاسبات في اوكرانيا
بيوم من الايام احمد يشوف خالد وي بنية سمرة تخبل .. ثاني يوم سأله
جاوبه خالد هاي خطيبتي .... مع انه هم طلاب بنفس القسم الداخلي بس ما يدري صديقه الحميم خاطب
احمد وي روحه ... حااااااااااااااته تخبل
خالد سمع ... كله من اليوم هي خطيبتك و بعد سمفونية خليها علينا و عيب عليك .... راح احمد خطب البنية من ابن خالتها اللي هو هم طالب بس بمعهد نفط
و بعد اسبوع احمد و مرته .. اختفوا
و بعد شهرين يرجع خالد اللي خسر خطيبته و صديقه و فلوسه للوطن الغال
و هو بالمطار يشوف وحدة حليوة (مو مثل انجلينا جولي بس شوية احلى منها) ...سلم عليها و سلمت عليه
و بعد يومين صار مدير عام الشركة مال ابوها المريض ...
و بعد اسبوعين تزوجوا
و بعدين شاف احمد و مرته بالعرس ... ما صدك روحه .. بعدين صاروا عين بعين ... و علكت
و كله يا حبيبي ... هاي مرتك اني دزيتها للمطار حتى تكلك تعال اشتغل بشركتنا اللي هي مالتي ... ... و تننطيك حصتها بالشركة حتى اعوضك على البوري مال اوكرانيا
و بعد البوس و الحضن ...
سالت دموع جميع الحضور حتى مدير الفندق نزلت دموعه
و رجعوا اصدقاء و اليوم هم اصحاب اكبر شكة مقاولات بالبلد بعد ان كانوا طلاب مرحلة اولى باوكرانيا
و همين الكل عاشت عيشة سعيدة
-------------
طبعا هاي القصص و عشرات غيرها هي مو قصص اطفال .... صحيح كتبتها باسلوب لا يخلو من السخرية
لكن هي قصص يصر كتابها انها حقيقة 100% ,,, و كل يوم نكتشف انها صارت بمدينة شكل .. ......
بنفس التفاصيل تماما بس بغير الاسماء !!
قصص ظاهرها يبعث على الامل و البسمة و الاحلام الوردية الخالصة
بس برأيي الشخصي ... هاي القصص انكتبت كمخدر للشعوب .... حتى يظل يحلم الشباب بالتوفيق و امكانية كسر كل الحواجز
حتى يظل يحلم يصير اكبر تاجر بكل البلد ... و رح يتزوج احلى امرأة بالعالم ....
و الرسالة الاهم ... هي ان الفقر كلمة وهمية لا وجود لها
لكن هذوله اللي يسمون حالهم فقراء ... هم ناس كسالى و ما عرفوا يلكون الفرصة و ما سعوا ... و لذلك ظلوا على هاي الحال ...
هذه القصص هي اللي تخلي الشاب يرضى باقسى ظروف الحياة و السكن على امل يصير مثل خالد و احمد
بالمناسبة ...
سامعين بالمقولة الشهيرة ... للحقيقة اوجه كثيرة
احمد و خالد بالاساس فتحوا مكتب قبولات للطلاب العرب ... و على كل طالب كذا مبلغ ... و يتفاجئ الطالب لا اكو قبول و لا بطيخ
و يجي للشقة اللي على اساس مكتب تطلع شركة وهمية
بس احمد خاف من الشرطة ... لذلك اخذ الفلوس كلها و انهزم
و من رجع للوطن .. فتح مشروع معمل خياطة
اخر شي اخذ مقاولات وي الدولة لان ابن الوزير (فلان الفلاني) هو صديقه بالمدرسة ... و اليوم احمد و خالد هم اصحاب حسابات ابن الوزير بالبنوك الاوربية
دوخناكم اكيد ... تعذورنا
5 comments:
حلوة ابو سارة
وينك هلأيام
ما تبين؟
حلوة ابو سارة
وينك هلأيام
ما تبين؟
هلا هلا
موجود ...بس شوي انشغلت بالفترة الاخيرة
هاي (سوالف عالمية )..عفيه عليك ابو سارة اشلون صايغها حلو..
شكرا جزيلا اخت صبا على المرور
و طبعا هاي سوالف عالمية يوميا نسمعها بصيغ جديدة من قبل المواطنين الاعزاء اللي دائما يكولون ... صارت وي ابن عمي
Post a Comment